沪语悦读：帽子戏法
沪语悦读：帽子戏法
本文是一篇用沪语改写的文化随笔，讲述了作者对头发问题的困扰以及如何通过戴帽子来解决这一问题。文章以轻松幽默的语气，展现了上海文化的独特魅力，值得一读。
近腔把，一直勒为“头”个事体头大。一，是头发颜色黑白相间，让人头痛。索性侪白了，倒也是“白波九道流雪山”，别具风采。但是偏生勿是全白。伊叫勿尴勿尬，勿二勿三。就搿能叫侬殟塞。两，是头发密度越来越稀，前头个额骨头先秃，后脑勺跟进，但是，两旁边个发际又勿肯跟牢仔一道秃，乃末，头顶心就变成功了“荷包孤岛”。
其实，对于头发个花白相间，我本来也并勿烦心，染染黑就好了。想勿到头发好像是越染越少了，到后来就索介呒没头发好染，看上去是黑了，其实只不过是头皮黑了。
戴假发套忒闷。种头发呢，又容易落脱。有朋友建议，一刀剃光好唻！六根清净。但是，我觉着也是有问题个：上古时代，五刑之一个髡（kun）刑，就是拿犯人个头发剃光示众，迭个其实就是一种“羞辱刑”。再讲，我个头型恶劣，头顶崎岖，又是常庄要去搭人家上课个，勒陌生头秃了，全班学生子肯定是要一场哄笑，课堂纪律啥人来负责啊？想想，要是生活勒陕北农村几化好啊，我完全好学学老农民，羊肚毛巾头浪向一扎；要是生活勒中东，也好堂而皇之戴好阿拉伯头巾“卡菲耶”，但是啊，我呒没搿种环境呀。
有一日，勿晓得哪能突然想到了王莽，王莽勿就是年纪轻轻就谢顶了嘛？东汉学者应劭搭仔蔡邕，分别勒《汉官仪》搭仔《独断》里向提到过：男子束发戴巾，称为帻，本来是“半帻”，遮脱一半头顶而已，但是，王莽头发秃得忒早，为了遮牢秃顶，只好拿“帻”放大，全覆盖遮牢头顶，搿能末，半帻就变成功了全帻，时髦个新款也就此推出，到王莽发迹之后，新款全帻影响就更加大了，简直是大庇天下秃士俱欢颜，也算得是功德一桩了。
由迭个“王莽帻”想到了帽子，我突然心里向一动，侬看，周围个老男人差勿多侪戴帽子了，伊拉侪显得比我年轻，原来，侪是勒白相帽子戏法啊！我是真个笨哎……
以前，我一直拎勿清，自家朋友圈里为啥“戴帽一族”介许多啦，好几位蛮熟悉个朋友，就算是大热天，也一定捂好仔只帽子，赛过梅干菜焐肉，为点啥啦？现在，我“啊哦”一声，晓得了，要紧拉过一顶屋里向新妇戴过个棒球帽，随手一套，再到镜子前头一照，呵呵，当场还我年华唻！明明已经奔七，带好帽子看上去完全可以冒充“五十天命”，啥个花白头发，啥个“地中海”“荷包蛋”，帽子轻轻叫一盖，蹉跎岁月，额骨头止步！再讲，额骨头总归是朝上个，欸把江湖浪传说个“杀猪刀”到了搿搭，马上就拨帽檐狙击了，根本杀勿过去。想想伊眼女士，美容美肤侪进美容院，要用脱几化银子啊！看我老男子一枚，区区一帽，就篡改了实际年龄，真是快哉呀，快哉！
不过，帽子到底是啥人发明个呢？大概就像文字个发明一样，没办法晓得了。埃及人是勒公元前三千年发明帽子个，伊拉当时是用帽子来遮太阳挡风沙个，博物馆里有实物为证。葛末，阿拉中土自家个先人，最先需要帽子，大概也是为了遮挡阳光风沙吧，所以顺手一张荷叶就是了，肯定也是实用第一。
上古文献里是呒没“帽子”迭个词个，只有“头衣”，意思就是头个衣裳。对个呀！四肢百骸侪有护饰，为啥头颅就勿必关照了呢？头衣，迭个名字真是忒确切了。所以，一直到秦汉辰光，头衣还勿叫“帽子”，士族男子个头衣叫冠、冕、弁，材料质地有竹木，有皮革个；样子呢，有圆形，也有平板个；皮弁是用白鹿个皮来做个，瓜皮帽个样子，但统称侪是“冠”。古代男子廿岁行冠礼，就是正式个成年人了，但是，戴帽子要讲尊卑规矩，并勿是人首一冠就算数了。未成年个人勿好戴，罪犯勿好戴，异族人勿好戴，平民勿好戴。乃末，搿眼人只好戴帻。而我想象个“陕北羊肚巾”从后头向前裹头，伊歇辰光倒真个是还有，搿种打扮叫“陌头”，用软纱做个。陌头个升级版呢，就是名闻天下个幞头，伊是一种包裹头部个纱罗软巾，后头有金属丝支撑个两支帽脚，文官叫展脚幞头，武官叫交脚幞头，又因为幞头一般侪是用青黑色个软纱做成功个，迭个，就是后世邪气有名、大名鼎鼎个“乌纱帽”了。
好了，帽子个来历是老老清爽了。但是，帽子戏法对我有啥好处呢？
尽管还是大冷天，但是绒线帽勿考虑，迭个忒卡通了；中山帽呢，忒土，啥人还要；礼帽哪能呢？我朋友王震坤只要礼帽一戴，真个叫是“台型轧足”。但是，礼帽蛮深个，恐怕我勿好效颦，震坤面孔长，正宗个一只“狼狗面孔”，我呢，看上去面孔是长个，其实长了额骨头，到辰光礼帽一戴，额骨头一压，立时三刻变成猫面孔了，勿要忒戆哦。
导演帽，也就是无檐个博士帽，当然腔势老浓，但是，画漫画个郑辛遥好戴迭种帽子，我绝对勿来事，我呒没艺术腔，装勿像个。
无檐八角帽，熟汤气，一副寿头腔。于是，我拿视线投向了嘉禄兄搭仔建星兄，前者戴个是短檐平顶帽，大方、沉着、帅气；后者呢，花格子呢个鸭舌帽，活泼、克勒、洋气。
我侪要了。相信伊拉也一定是精心选择之后再定型个，确实成熟。所以，尽管帽子个隐喻忒多，马路浪个“大盖帽”，隐喻行政执法；医院里个“戴帽子”，象征慢性病定性；股市里“抢帽子”，比喻投机操作……但是，我现在只管我自家个帽子戏法。
经典个帽子戏法，可以变出百花、气球甚至飞鸽，我自家倒是也可以立刻变出个伪劣个中年人，不过伊个质地尽管蛮有可疑之处，让伊再混个十年，应该没啥问题个伐。
本文原文来自新民晚报，作者胡展奋，沪语改写：郭莉，讲述：李国琪，文字、语音审核：丁迪蒙，后期制作：沉默是金，编辑：王乙其。
丁迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社